وزیراعظم آزاد کشمیر کی ڈاکٹروں کو دور دراز علاقوں میں خدمات انجام دینے کی ہدایت

مظفرآباد: وزیراعظم آزاد جموں و کشمیر افتخار گیلانی نے نئے فارغ التحصیل ڈاکٹروں پر زور دیا ہے کہ وہ اپنی پیشہ ورانہ ذمہ داریوں کی ادائیگی کے دوران بالخصوص دور دراز اور طبی سہولیات سے محروم علاقوں کے عوام کی خدمت کو ترجیح دیں۔وزیراعظم نے پیر کو آزاد جموں و کشمیر میڈیکل کالج میں ’’سمپوزیم 2026‘‘ کا افتتاح کرتے ہوئے کہا کہ ریاست بھر میں طبی سہولیات کی بہتری اور عوام کو معیاری علاج کی فراہمی حکومت کی اہم ترجیحات میں شامل ہے۔میڈیکل کالج آمد پر وزیر صحت ڈاکٹر مصطفیٰ بشیر، سیکریٹری صحت عامر رضا ٹیپو، پرنسپل ڈاکٹر عدنان معراج، فیکلٹی ممبران اور طلبہ نے وزیراعظم کا استقبال کیا۔ سمپوزیم کے دوران خصوصی پریزنٹیشنز بھی پیش کی گئیں۔تقریب سے خطاب کرتے ہوئے وزیراعظم افتخار گیلانی نے کہا کہ طبی تعلیم کو صرف فنی مہارت اور میڈیکل سائنس تک محدود نہیں ہونا چاہیے بلکہ اس کے ذریعے ڈاکٹروں میں ہمدردی، پیشہ ورانہ دیانت، احساسِ ذمہ داری اور انسانیت کی خدمت کا جذبہ بھی پیدا ہونا چاہیے۔انہوں نے کہا کہ ایک اچھے ڈاکٹر کی پہچان صرف اس کے طبی علم اور پیشہ ورانہ صلاحیت سے نہیں ہوتی بلکہ مریضوں کے ساتھ ہمدردانہ اور خوش اخلاق رویہ اور انسانی تکالیف کم کرنے کا حقیقی جذبہ بھی اس پیشے کا بنیادی تقاضا ہے۔وزیراعظم نے کہا کہ حکومت آزاد کشمیر میں صحت کے نظام کو مزید مؤثر بنانے اور طبی سہولیات کی فراہمی بہتر کرنے کے لیے اقدامات کر رہی ہے۔ انہوں نے اعلان کیا کہ آزاد جموں و کشمیر میڈیکل کالج میں طلبہ، اساتذہ اور دیگر افراد کی سہولت کے لیے کینٹین اور پارکنگ کے منصوبوں کو سالانہ ترقیاتی پروگرام میں شامل کر لیا گیا ہے۔افتخار گیلانی نے نئے ڈاکٹروں پر زور دیا کہ وہ اپنی صلاحیتوں کو اپنے علاقوں اور عوام کی خدمت کے لیے استعمال کریں، بالخصوص لیپہ، نیلم اور حویلی جیسے دور دراز علاقوں میں طبی عملے کی دستیابی یقینی بنانے میں اپنا کردار ادا کریں۔انہوں نے کہا کہ بڑے شہری مراکز سے دور رہنے والے شہریوں کو بھی بنیادی اور معیاری طبی سہولیات تک رسائی حاصل ہونی چاہیے، اس لیے ڈاکٹروں کو طبی سہولیات سے محروم علاقوں میں خدمات انجام دینے کی پیشہ ورانہ ذمہ داری قبول کرنی چاہیے۔سمپوزیم سے وزیر صحت آزاد کشمیر ڈاکٹر مصطفیٰ بشیر نے بھی خطاب کیا۔