اے جے کے ون پورٹل کو تمام سرکاری خدمات کا جامع ڈیجیٹل پلیٹ فارم بنانے کی ہدایت

اسلام آباد: وزیراعظم آزاد جموں و کشمیر افتخار گیلانی نے متعلقہ حکام کو ہدایت کی ہے کہ **اے جے کے ون پورٹل** کو ایک جامع اور عوام دوست ڈیجیٹل پلیٹ فارم بنایا جائے، جہاں شہری ایک ہی آن لائن نظام کے ذریعے سرکاری خدمات حاصل کرنے، شکایات درج کرانے، روزگار کے مواقع سے متعلق معلومات اور تعلیمی اداروں کی تفصیلات تک رسائی حاصل کرسکیں۔وزیراعظم نے کہا کہ اس اقدام کا مقصد سرکاری خدمات کی فراہمی کو جدید خطوط پر استوار کرنا، شہریوں کو سہولت فراہم کرنا، سرکاری دفاتر کے غیر ضروری چکر کم کرنا اور جدید ٹیکنالوجی کے مؤثر استعمال کے ذریعے حکومت اور عوام کے درمیان براہ راست رابطے کو مضبوط بنانا ہے۔انہوں نے ان خیالات کا اظہار **اے جے کے ون پورٹل** میں مجوزہ سہولیات اور فیچرز کا جائزہ لینے کے لیے منعقدہ اعلیٰ سطح کے اجلاس کی صدارت کرتے ہوئے کیا۔اجلاس میں وزرا کرنل (ر) وقار احمد نور، ڈاکٹر مصطفیٰ بشیر عباسی، چیف سیکریٹری خوشحال خان، انسپکٹر جنرل پولیس کیپٹن (ر) لیاقت علی ملک، ایڈیشنل چیف سیکریٹری ترقیات عاطف رحمان، پرنسپل سیکریٹری عدنان خورشید، سیکریٹری خزانہ حسن مسعود، سیکریٹری اطلاعات و انفارمیشن ٹیکنالوجی راشد حنیف، پنجاب انفارمیشن ٹیکنالوجی بورڈ کے ایڈیشنل ڈائریکٹر جنرل کاشف فاروق، خرم مشتاق اور دیگر متعلقہ حکام نے شرکت کی۔اجلاس کے دوران وزیراعظم کو پورٹل کے ذریعے فراہم کی جانے والی مجوزہ ڈیجیٹل خدمات اور اس کے عملی طریقہ کار کے بارے میں تفصیلی بریفنگ دی گئی۔وزیراعظم افتخار گیلانی نے متعلقہ محکموں کو ہدایت کی کہ پورٹل کو شہریوں کی ضروریات کو مدنظر رکھتے ہوئے تیار کیا جائے اور اس پر تمام سرکاری محکموں اور ان کی خدمات سے متعلق معلومات آسانی سے دستیاب ہوں۔انہوں نے کہا کہ پورٹل پر شہریوں کی شکایات کے اندراج اور ان کے مؤثر ازالے کا نظام، سرکاری ملازمتوں کے مواقع کی تفصیلات اور تعلیمی اداروں سے متعلق ضروری معلومات بھی فراہم کی جائیں۔وزیراعظم نے کہا کہ شہریوں کو بنیادی معلومات یا سرکاری خدمات حاصل کرنے کے لیے بار بار سرکاری دفاتر کے چکر نہ لگانا پڑیں بلکہ وہ گھر بیٹھے ایک ہی ڈیجیٹل پلیٹ فارم کے ذریعے ضروری معلومات اور خدمات تک رسائی حاصل کرسکیںانہوں نے کہا کہ **اے جے کے ون پورٹل حکومت اور عوام کے درمیان مؤثر ڈیجیٹل پل کا کردار ادا کرے گا** اور اس کے ذریعے سرکاری خدمات کو زیادہ آسان، تیز اور مؤثر بنایا جاسکے گا۔وزیراعظم نے متعلقہ حکام کو ہدایت کی کہ تمام ضروری معلومات اور سرکاری خدمات کو پورٹل پر دستیاب بنانے کے لیے اقدامات کیے جائیں تاکہ آزاد جموں و کشمیر کے شہری اپنی مختلف ضروریات ایک ہی ڈیجیٹل پلیٹ فارم کے ذریعے پوری کرسکیں۔حکومت آزاد کشمیر کا یہ اقدام ٹیکنالوجی پر مبنی طرز حکمرانی کے فروغ، انتظامی کارکردگی میں بہتری اور عوام کو سرکاری خدمات تک آسان رسائی فراہم کرنے کی کوششوں کا حصہ ہے۔